“Drink responsibly”: Paalala o Palusot?

Fake news ang “drink responsibly.” Isa lamang ito sa mga diskarte ng alcohol industry upang ilihis ang atensyon mula sa tunay na problema— ang alak mismo.

Sino nga ba ang mga tunay na may pananagutan sa malawak na pinsala at pahamak na dulot ng alak sa ating kalusugan at ekonomiya? At ano ang mga malimit nilang palusot?

Fake News #1: “Drink responsibly”

Palusot ito ng industriya para ipasa ang sisi sa konsyumer. Pero ayon sa World Health Organization (WHO), kahit kakaunti o marami ang pagkonsumo ng alak, may pahamak ito sa kalusugan.

Ang alkohol ay lason at nakaaadik na substance. Tinukoy ito ng International Agency for Research on Cancer bilang isang Group 1 Carcinogen, kahanay ng asbestos, radiation, at tabako. Ayon sa WHO, kalahati ng mga kaso ng kanser na dulot ng alak ay nagmumula sa “light” o “moderate” drinking—ang parehong antas na tinatawag ng alcohol industry na "responsable."

Fake News # 2: Ang pagtataas ng buwis sa alak ay “pagkakaitan ang mahihirap sa kanilang mumunting kasiyahan”

Malaking pasakit sa mamamayang Pilipino at ekonomiya ng bansa ang dulot ng alak. Ayon sa Sin Tax Coalition, nalulugi ang ekonomiya natin ng ₱203B taun-taon dahil sa epekto ng alak, mula sa maagang pagkamatay hanggang sa mga sakit sa atay, puso, o kanser. Kapag nagkakasakit o namamatay ang ating mga mamamayan at manggagawa, nababawasan ang nakakapagtrabaho, nakakatulong sa kanilang pamilya, at nakakapag-ambag sa ating ekonomiya.

Samantala, mabigat din ang pinapasan ng gobyerno dahil sa alak. Mahigit ₱101B ang direct cost o ang gastusin sa serbisyong medikal, emergency care, rehabilitasyon, at iba pang serbisyong pangkalusugan.

Sa kabuuan, umabot sa ₱305.68B ang economic burden ng alak noong 2021—sampung beses na mas malaki kaysa badyet ng Department of Health ngayong taon!

Bukod dito, naitala rin ang 27,477 pagkamatay na may kaugnayan sa pag-inom ng alak noong 2021. Sa madaling sabi, hindi lamang personal na isyu ang pagkonsumo ng alak kundi usaping pangkalusugan at pang-ekonomiya.

Fake News #3: Parusa sa local alcohol industry ang alcohol taxes

Limpak-limpak ang kinikita ng alcohol industry. Noong 2022, pito sa mga pinakamalaking kumpanya ng alcohol at tobacco sa Pilipinas ay kumita ng P506 billion.

Hindi ikakalugi ng alcohol industry ang pagpataw ng mas mataas ng buwis sa alak, lalo kung ang kapalit nito ay proteksyon para sa ating mga kabataan.

Sa halip na parusa, mas mataas na buwis sa alak ang magbibigay-proteksyon sa kabataan. Sa ulat ng WHO, bumaba ang mga namatay sa Lithuania mula sa alak matapos nilang itaas ang buwis noong 2017. Lumaki rin ang kita ng gobyerno mula sa buwis—mula €234M noong 2016, naging €323M ito noong 2018.

Fake News #4: “Labis” ang pagtataas ng buwis sa alak

Oo, tumataas kada taon ng 5% ang buwis sa alak, pero nananatili pa rin ang alak sa Pilipinas bilang isa sa pinakamura sa buong mundo. Ang tanong: sino nga ba ang talagang nakikinabang kung mananatiling mura ang alak?

Mula sa buwis na nakolekta mula sa alcohol at iba pang ‘sin tax’ products, inilaan ang PHP 55B para sa Universal Health Care o UHC. Mahigit 4.14M Pilipino ang nabigyan ng tulong medikal at mahigit 21,000 pasilidad pangkalusugan ang naipatayo o nasimulan. Malaking suporta rin ito para sa mahigit 104M na Pilipinong rehistrado sa PhilHealth para mas maraming serbisyong medikal ang sagot ng gobyerno.

Hindi ito hadlang o parusa—ito ay puhunan para sa kalusugan ng mga Pilipino, lalo na ng kabataan.

Ngayong sandamakmak ang ebidensiya ng malaking pahamak ng alak sa buhay ng mga Pilipino, panahon na para hamunin ang mga kandidato ngayong 2025: ipasa ang batas para taasan ang buwis sa alak. Ihalal natin ang mga kandidatong hindi nagpapalusot, kundi lumalaban para sa mas mataas na buwis sa alak at mas ligtas na kinabukasan ng kabataan!

AJ Montesa is a former Program Officer and Policy Researcher of Action for Economic Reforms.